ជនជាតិចិនម្នាក់ទៅរៀនបាញ់កាំភ្លើង បែជាបាញ់សម្លាប់ខ្លួនឯង នៅក្នុងទីលានបាញ់កាំភ្លើងភ្នំពេញរបស់លោក សុខ ខេមរិន
05-April-2019 | ដោយ ពលមនសិការ
ភ្នំពេញ៖ ជនជាតិចិនម្នាក់ទៅរៀនបាញ់កាំភ្លើង បែជាបាញ់សម្លាប់ខ្លួនឯងយ៉ាងសាហាវទៅវិញនៅក្នុងទីលានបាញ់កាំភ្លើងភ្នំពេញរបស់លោក សុខ ខេមរិន នៅក្បែរអង្គភាពតម្រួតបទបញ្ជា នៃអគ្គស្នងការដ្ឋាននគរបាលជាតិស្ថិតនៅសង្កាត់ត្រពាំងក្រសាំង ខណ្ឌពោធិ៍សែនជ័យ កាលពីថ្ងៃទី៤ ខែមេសា ឆ្នាំ២០១៩។
យោងតាមខ្លឹមវីដេអូកាំមេរ៉ាបែកធ្លាយពីកន្លែងបាញ់កាំភ្លើងរបស់លោក សុខ ខេមរិន្ទ ដែលសារព័ត៌មានយើងទទួលបាននៅព្រឹកថ្ងៃទី៥ ខែមេសា ឆ្នាំ២០១៩នេះ។
ទោះយ៉ាងណាមិនទាន់មានប្រភពច្បាស់ការថាបណ្តាមកពីមូលហេតុអ្វីនោះទេ ទើបបណ្តាលឲ្យជនជាតិចិននោះបាញ់សម្លាប់ខ្លួនឯងបែបនេះ។ ចំពោះអត្តសញ្ញាណជនរងគ្រោះ(សព) សមត្ថកិច្ចក៏មិនទាន់បានឲ្យដឹងនៅឡើយគិតត្រឹមព្រឹកថ្ងៃទី៥នេះ។
សូមរំលឹកថា ក្លឹបកំសាន្ដទីលានបាញ់កាំភ្លើងអន្ដរជាតិភ្នំពេញ បានបើកដំណើរការសាកល្បង នៅថ្ងៃទី០៣ ខែតុលា ឆ្នាំ២០១៧ ស្ថិតនៅភូមិខ្ញី សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានភ្នំពេញ ជាប់អង្គភាពតម្រួតបទបញ្ជា។
លោក សុខ ខេមរិន ដែលជាអ្នកគ្រប់គ្រងក្លឹបកំសាន្ដទីលានបាញ់កាំភ្លើងអន្ដរជាតិភ្នំពេញ បានលើកឡើងថា គោលបំណងនៃការបង្កើតក្លឹបកំសាន្ដនេះឡើង ដើម្បីអ្នកដែលមានសិទ្ធិកាន់កាប់ និងប្រើប្រាស់អាវុធទាំងអស់ឃ្លានឆ្ងាយពីទណ្ឌកម្មនៃទោស ហើយលោកជឿជាក់ថា នៅពេលពលរដ្ឋដឹងពីការប្រើប្រាស់អាវុធ ច្បាស់ណាស់ពលរដ្ឋមិនយកទៅប្រើប្រាស់ផ្ដេសផ្ដាស់នោះទេ។
អ្នកគ្រប់គ្រងរូបនេះ បានបញ្ជាក់ដែរថា ហេដ្ឋារចនាសម្ព័ន្ធក្នុងក្លឹបកំសាន្ដបាញ់កាំភ្លើងនេះ មានដូចជា កន្លែងបាញ់កាំភ្លើងលក្ខណៈក្នុង និងក្រៅបន្ទប់ជាច្រើនទូ, កន្លែងសម្រាប់ហ្វឹកហាត់បាញ់កាំភ្លើងទូ, បាញ់ធ្នូរ និងកន្លែងកាំភ្លើងវ៉ាំងដឺឡុងផងដែរ។
បើតាមការលើកឡើងរបស់ លោក សុខ ខេមរិន ក្លឹបកំសាន្ដនេះផងដែរ ក៏បង្កើតឲ្យមានបន្ទប់ពិសារតែលក្ខណៈ VIP ភោជនីយដ្ឋាន បន្ទប់ប្រជុំ បន្ទប់ទទួលភ្ញៀវ និងផ្សារទំនិញពាណិជ្ជកម្មជាដើម ដើម្បីកាន់តែផ្ដល់ភាពងាយស្រួលដល់អតិថិជន សម្រាប់ការមកជាវនូវសម្ភារផ្សេងដែលប្រើប្រាស់ជាមួយកាំភ្លើងផងដែរ។
ក្លឹបកម្សាន្តទីលានបាញ់កាំភ្លើងអន្ដរជាតិភ្នំពេញនេះ ត្រូវបានបង្កើតឡើងដោយ ក្រុមហ៊ុនឯកជនរបស់កម្ពុជា សហការជាមួយក្រុមហ៊ុនឯកជនរបស់ចិន ដោយទទួលបានសិទ្ធិអនុញ្ញាពីសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងអាជ្ញាធរពាក់ព័ន្ធផងដែរ ដោយបញ្ជាក់ពីភាពស្របច្បាប់ និងត្រឹមត្រូវរបស់ក្លឹបនេះ ៕
ចំនួនអ្នកទស្សនា
- ថ្ងៃនេះ7431
- ម្សិលមិញ6261
- សប្តាហ៍នេះ25811
- ខែនេះ140961
- ឆ្នាំនេះ140961
- សរុប20583417